…………
ಪರಿಚಯಸ್ಥ ರೈತರೊಬ್ಬರು ಹಂಚಿಕೊಂಡ ಘಟನೆ.
ಅವರ ಪರಿಚಯದ ರೈತರೊಬ್ಬರು ತುಂಬಾ ಚೆನ್ನಾಗಿ ಸಾವಯವ ಕೃಷಿ ಮಾಡಿ ಸೈ ಎನಿಸಿಕೊಂಡಿದ್ದಾರಂತೆ. ಅವರ ಕೃಷಿ ಪ್ರಗತಿಯನ್ನು ನೋಡಿ ಖುಷಿಕೊಂಡ ಮಿತ್ರರೊಬ್ಬರು “ಟಿವಿ ಚಾನಲ್ಲುಗಳಲ್ಲಿ ಕೃಷಿ ಕಾರ್ಯಕ್ರಮಗಳು ಪ್ರಸಾರವಾಗುತ್ತವೆ. ನಿಮ್ಮ ತೋಟ, ನಿಮ್ಮ ಸಾಧನೆ ಟಿವಿಯಲ್ಲಿ ಬರಲು ಸೂಕ್ತವಾಗಿದೆ. ನೀವೇ ಅವರಿಗೆ ನಿಮ್ಮ ಕೆಲಸದ ಬಗ್ಗೆ ಹೇಳಿ. ಅವರು ಬಂದು ಕವರ್ ಮಾಡಿಕೊಂಡು ಹೋಗುತ್ತಾರೆ” ಅಂದರಂತೆ.
ಮಾಡಬಹುದಲ್ಲಾ ಎಂದುಕೊಂಡ ರೈತರು, ಖ್ಯಾತ ಖಾಸಗಿ ಟಿವಿ ಚಾನಲ್ ಒಂದರ ಕೃಷಿ ಕಾರ್ಯಕ್ರಮದ ನಿರ್ಮಾಪಕರನ್ನ ಸಂಪರ್ಕಿಸಿ ತಮ್ಮ ಎಲ್ಲ ವಿವರಗಳನ್ನ ನೀಡದರಂತೆ. ಇವರ ಸಾಧನೆಯಿಂದ ಖುಷಿಯಿಂದ ನಿರ್ಮಾಪಕರು ಶೀಘ್ರವೇ ಕಾರ್ಯಕ್ರಮ ಮಾಡುವುದಾಗಿ ಭರವಸೆ ನೀಡಿದರಂತೆ. ಒಂದೆರಡು ದಿನಗಳ ನಂತರ ಮತ್ತೆ ಕಾಲ್ ಮಾಡಿದ ನಿರ್ಮಾಪಕರು, “ಸಾರ್, ನಿಮ್ಮ ಬಗ್ಗೆ ಕಾರ್ಯಕ್ರಮ ಮಾಡಲು ನಾವು ಒಪ್ಪಿದ್ದೇವೆ. ಆದರೆ ಒಂದು ಸಣ್ಣ ಬದಲಾವಣೆ ಮಾಡಿಕೊಳ್ಳಬೇಕು. ಅದಕ್ಕೆ ನೀವು ಒಪ್ಪಬೇಕು” ಅಂದರಂತೆ. ಏನು ಬದಲಾವಣೆ ಅಂದಾಗ,
”ನೀವು ಸಾವಯವ ಕೃಷಿ ಮಾಡಿದ್ದೀರಿ. ತುಂಬಾ ಸಂತೋಷದ ವಿಚಾರ. ಸಾವಯವ ಕೃಷಿ ಮಾಡಿ ಹಲವು ರೈತರು ಅಭಿವೃದ್ಧಿ ಹೊಂದಿದ್ದಾರೆ. ನಾವು ನಿಮ್ಮ ಬಗ್ಗೆ ಕಾರ್ಯಕ್ರಮ ಮಾಡುತ್ತೇವೆ. ಆದರೆ ನಿಮ್ಮ ಸಂದರ್ಶನದಲ್ಲಿ ನೀವು ರಾಸಾಯನಿಕ ಗೊಬ್ಬರ ಬಳಸಿ ಇಷ್ಟು ಇಳುವರಿ ಪಡೆದಿದ್ದೀರಾ ಅಂತ ಹೇಳಬೇಕು” ಅಂದರಂತೆ. ಆದರೆ ರೈತರು ಇದಕ್ಕೆ ಒಪ್ಪಲಿಲ್ಲ. ಮಾಡಿದ್ದು ಸಾವಯವ ಕೃಷಿ, ಅಭಿವೃದ್ಧಿ ಕಂಡಿದ್ದು ಕೂಡ ಸಾವಯವ ಕೃಷಿಯಲ್ಲಿಯೇ. ಅಂತಹದ್ದರಲ್ಲಿ ಟಿವಿಯಲ್ಲಿ ಕಾರ್ಯಕ್ರಮ ಬರಬೇಕು ಎಂಬ ಒಂದೇ ಕಾರಣಕ್ಕೆ ಯಾಕೆ ಈ ರೀತಿ ಸುಳ್ಳು ಹೇಳಿಕೆ ನೀಡಬೇಕು ಅಂತ ರೈತರು ಸುಮ್ಮನಾದರು.
ನಂತರ ಆ ರೈತರಿಗೆ ಗೊತ್ತಾಗಿದ್ದು, ಖಾಸಗಿ ಚಾನಲ್ ನ ಕೃಷಿ ಕಾರ್ಯಕ್ರಮಕ್ಕೆ ದೊಡ್ಡ ಮಟ್ಟದಲ್ಲಿ ಜಾಹೀರಾತು ಬರುವುದು ರಾಸಾಯನಿಕ ಗೊಬ್ಬರ ಕಂಪನಿಗಳಿಂದ. ಆ ಕಂಪನಿಗಳು ಹೇಳಿದಂತೆ ಕಾರ್ಯಕ್ರಮಗಳು ಆಗುತ್ತವೆಯೇ ಹೊರತು, ಕಾರ್ಯಕ್ರಮ ನಿರ್ಮಾಪಕರು ಅಥವಾ ಚಾನಲ್ ಹೇಳಿದ ಹಾಗಲ್ಲ. ಸಾವಯವ ಕೃಷಿ, ಸಹಜ ಕೃಷಿ, ಶೂನ್ಯ ಬಂಡವಾಳ, ದೇಸೀ ಪದ್ಧತಿ ಎಂಬ ಹೆಸರು ಕೃಷಿ ಕಾರ್ಯಕ್ರಮದಲ್ಲಿ ಕೇಳಿ ಬಂದರೆ, ಜಾಹೀರಾತು ಕಟ್, ದುಡ್ಡೂ ಕಟ್.
ಅನ್ನದಾತ ಸುಖೀಭವ….
ರಾಜ್ಯದಲ್ಲಿ ಕೃಷಿಯ ಕುರಿತು ಸರ್ಕಾರದ ಗೊಂದಲ ನೀತಿ ಮತ್ತೊಮ್ಮೆ ಬಯಲಾಗಿದೆ. ಕಳೆದ ಬಾರಿ ಗೊಬ್ಬರ ಗಲಾಟೆಯಾದಾಗ ಗೋಲಿಬಾರ್ ಮೂಲಕ ಪ್ರತಿಭಟನೆ ಹತ್ತಿಕ್ಕಿದ್ದ ಸರ್ಕಾರ, ಬಳಿಕ ಸಹಜ ಹಾಗೂ ಸಾವಯವ ಕೃಷಿಯ ಜಪ ಮಾಡಿತ್ತು. ಸಾವಯವ ಕೃಷಿಯನ್ನು ಪ್ರೋತ್ಸಾಹಿಸಬೇಕು ಎಂದು ಬೊಬ್ಬಿಡುತ್ತ, ಸಹಜ ಕೃಷಿ ಪರಿಣಿತ ಸುಭಾಷ್ ಪಾಳೆಕರ್ ಅವರನ್ನು ಶಾಸಕರ ಭವನಕ್ಕೆ ಕರೆಸಿ ನಾಲ್ಕಾರು ಶಾಸಕರೆದುರು ಉಪನ್ಯಾಸ ನೀಡಿಸಿತ್ತು. ಆ ಮೂಲಕ ತನಗೆ ಸಹಜ ಹಾಗೂ ಸಾವಯವ ಕೃಷಿಯ ನಡುವಿನ ವ್ಯತ್ಯಾಸದ ಅರಿವಿಲ್ಲ ಎಂದು ಪರೋಕ್ಷವಾಗಿ ಸಾರಿತ್ತು. ಇದು ಸಾಲದೆಂಬಂತೆ, ರಾಜ್ಯದ ಎಲ್ಲ ರೈತರನ್ನೂ ವಿಧಾನ ಸೌಧಕ್ಕೆ ಕರೆಸಿಕೊಂಡು ಸಾವಯವ ಕೃಷಿ ಮಾಡುವುದಾಗಿ ಆಣೆ-ಪ್ರಮಾಣ ಮಾಡಿಸಿಕೊಂಡಿತ್ತು.
ಚಿಠ್ಠೀ ಆಯೀ ಹೈ…