“Cautious Mind – ನನ್ನ ಕಿತಾಪತಿಗಳ ಜಗತ್ತು” ಆರಂಭ ಮಾಡಿ ನಿನ್ನೆ ಮಧ್ಯರಾತ್ರಿ 12 ಗಂಟೆಗೆ ಏಳು ವರ್ಷ ತುಂಬಿದೆ. ಇದೀಗ 8 ನೇ ವರ್ಷವನ್ನು ಸ್ವಾಗತಿಸುತ್ತಿದ್ದೇನೆ. ಬ್ಲಾಗ್ ಆರಂಭ ಮಾಡಿದಾಗ ನನಗಿದ್ದ ಉತ್ಸಾಹದಲ್ಲಿ ಒಂದು ಗುಲಗಂಜಿಯಷ್ಟೂ ಉತ್ಸಾಹ ಕಡಿಮೆಯಾಗಿಲ್ಲ. ಹಿಟ್ಸ್ ಗಳು ಹೆಚ್ಚಿದಾಗ ಉಬ್ಬಿದ್ದೇನೆ, ಇಲ್ಲದೇ ಇದ್ದಾಗ ತಲೆ ಕೆಡಿಸಿಕೊಂಡಿದ್ದೇನೆ. (ಎಷ್ಟೆಂದರೂ ಉಪ್ಪು ಖಾರ ಹುಳಿ ತಿಂದು ಬೆಳೆಯುತ್ತಿರುವ ಶರೀರ ಅಲ್ಲವೆ? ನಾನು ಸ್ಥಿತಪ್ರಜ್ಞ ಖಂಡಿತ ಅಲ್ಲ ಎಂದು ಕೃಷ್ಣನನ್ನು ಪ್ರಮಾಣ ಮಾಡಿ ಹೇಳುತ್ತೇನೆ 🙂 ).
ಈ ಏಳು ವರ್ಷಗಳಲ್ಲಿ ನಾನು ನನ್ನ ಬರವಣಿಗೆಯನ್ನು ತಿದ್ದಿಕೊಳ್ಳಲು, ಅಭಿಪ್ರಾಯ ಹಂಚಿಕೊಳ್ಳಲು, ಹೊಸ ಗೆಳೆಯ-ಗೆಳತಿಯರನ್ನು ಸಂಪಾದಿಸಲು, ಕಿತಾಪತಿ ಮಾಡಲು, ಬೆಂಕಿ ಹಚ್ಚಲು, ಹಚ್ಚಿದ ಬೆಂಕಿಯನ್ನು ನಂದಿಸಲು, ನನ್ನ ಪ್ರೀತಿಯ ಕಾಷಿಯಸ್ ಮೈಂಡ್ ನನಗೆ ಸಹಾಯ ಮಾಡಿದೆ.
ಒಂದು ಕಾಲಘಟ್ಟದಲ್ಲಿ ಬ್ಲಾಗ್ ಗಳ ಪ್ರವಾಹವೇ ಬಂದಿತ್ತು. ನೂರಾರು ಬ್ಲಾಗ್ ಗಳು ದಿಢೀರ್ ಎಂದು ಆರಂಭಗೊಂಡಿದ್ದವು. ಆದರೆ ಅಂತಹ ನೂರಾರು ಬ್ಲಾಗ್ ಗಳಲ್ಲಿ ಇಂದು ಕೆಲವೇ ಕೆಲವು ಉಳಿದುಕೊಂಡಿವೆ. ಅದಕ್ಕೆ ಕಾರಣಗಳು ಏನೇ ಇರಲಿ. ನನಗೆ ನನ್ನ ಬ್ಲಾಗ್ ಒಂದು ಹಂತಕ್ಕೆ ಬಂದಿರುವುದು ಹಾಗೂ ಬೆಳೆಯುತ್ತಿರುವುದು ಸಮಾಧಾನ ತಂದಿದೆ. ಉತ್ಸಾಹ ಹೆಚ್ಚಿಸಿದೆ.
Cautious Mind ತನ್ನ 8 ನೇ ಹುಟ್ಟುಹಬ್ಬ ಆಚರಿಸುತ್ತಿರುವುದಕ್ಕೆ ಕಾರಣ, ತಾವು ಹಾಗೂ ತಮ್ಮ ಪ್ರೀತಿ ಮತ್ತು ಕಾಳಜಿ ಎಂದು ವಿನಮ್ರವಾಗಿ ಹೇಳಬಯಸುತ್ತೇನೆ. ತಾವು ಬೆನ್ನುತಟ್ಟಿದ್ದು, ಓದಿದ್ದು, ಕಿವಿ ಹಿಂಡಿದ್ದು ಎಲ್ಲವೂ ನನಗೆ ನೆರವಾಗಿದೆ. ತಮ್ಮ ಪ್ರೀತಿ ಮತ್ತು ಕಾಳಜಿ ಹೀಗೆ ಮುಂದುವರೆಯಲಿದೆ ಎಂಬ ವಿಶ್ವಾಸ ನನ್ನದು.
ತಮಗೆ ಧನ್ಯವಾದ ಹೇಳಿದರೆ ಅದು ಕೇವಲ ಸಣ್ಣ ಪದವಾದೀತು ಹಾಗೂ ವಾಚ್ಯವಾದೀತು. ಹೀಗಿದ್ದರೂ ನಿಮಗೆ ನನ್ನ ಮನಃಪೂರ್ವಕ ಧನ್ಯವಾದ.
ತಮ್ಮ ವಿಶ್ವಾಸಿ
ಸುಘೋಷ ಎಸ್. ನಿಗಳೆ
CAUTIOUS MIND 